കലൂരില് നൃത്ത പരിപാടിക്കിടെയുണ്ടായ അപകടത്തില് വീണ് ഗുരുതരമായി പരിക്കേറ്റ തൃക്കാക്കര എംഎല്എ ഉമാ തോമസിന്റെ ആരോഗ്യ നിലയില് പുരോഗതിയുണ്ടെന്നറിയിച്ച് ആശുപത്രി അധികൃതർ. നിലവില് തീവ്രപരിചരണ വിഭാഗം വെന്റിലേറ്ററില് തുടരുന്ന എംഎല്എയുടെ ശ്വാസ കോശത്തിന്റെ ആരോഗ്യസ്ഥിതിയില് നേരിയ പുരോഗതിയുണ്ട്. ആരോഗ്യസ്ഥിതിയില് നേരിയ പുരോഗതിയുണ്ടെങ്കിലും വെന്റിലേറ്റര് സഹായം തുടരുമെന്ന് ഡോക്ടര്മാര് അറിയിച്ചു. ഇടവിട്ടാണ് വെന്റിലേറ്റര് സഹായം നല്കുന്നത്. എന്നാല് സ്വയം ശ്വാസമെടുക്കാന് പ്രാപ്തയാകുന്നതു വരെ വെന്റിലേറ്ററില് തുടരും. തലച്ചോറിനേറ്റ പരിക്കില് കാര്യമായ ആശങ്കയില്ല. വാരിയെല്ലുകള് ഒടിഞ്ഞതിനാല് ചികിത്സചെയ്യുന്നുണ്ട്. കഴിഞ്ഞ ദിവസം കണ്ണുകള് തുറക്കുകയും കൈകാലുകള് ചലിപ്പിക്കുകയും ചെയ്തിരുന്നു. മകന് പുതുവത്സരാംശംസയും നേര്ന്നിരുന്നു.