സര്‍ക്കാരിന്റെ വിശ്വസ്തരെ രാജ്ഭവനിലെത്തിക്കാൻ നീക്കം

തിരുവനന്തപുരം: ഗവർണർ രാജേന്ദ്ര വിശ്വനാഥ് അർലേക്കർ കേരള ഗവർണറായി അധികാരമേറ്റെടുത്ത ശേഷം ആദ്യദിനം തന്നെ സംസ്ഥാന സർക്കാരിന് നിർദ്ദേശം.

ഗവർണറുടെ ആദ്യ നിർദ്ദേശം തന്നെ സംസ്ഥാന സർക്കാർ അതേപടി നടപ്പാക്കുകയും ചെയ്തു. മുൻ ​ഗവർണർ ആരിഫ് മുഹമ്മദ് ഖാൻ ഗവർണറായിരിക്കെ സുരക്ഷാ ചുമതലയിലുണ്ടായിരുന്ന ഏതാനും പൊലീസ് ഉദ്യോഗസ്ഥരെ മാറ്റി പുതിയ പൊലീസുകാരെ ഗവർണറുടെ സുരക്ഷക്കായി നിയോഗിച്ചിരുന്നു. ഗവർണറായിരുന്ന ആരിഫ് മുഹമ്മദ് ഖാനു വിശ്വസ്തരായിരുന്ന ഉദ്യോഗസ്ഥരെയാണ് ഒഴിവാക്കിയത്. പകരം സർക്കാരിനും ആഭ്യന്തരവകുപ്പിനും വേണ്ടപ്പെട്ടവരെ രാജ്ഭവനിലേക്ക് നിയോഗിക്കാനുള്ള നീക്കമായിരുന്നു സർക്കാരിന്റേത്. ഡിജിപിയുടെ ചുമതലയുള്ള എഡിജിപി മനോജ് ഏബ്രഹാമിനെ രാജ്ഭവനിലേക്കു വിളിച്ചു വരുത്തി ഈ തീരുമാനം തിരുത്താൻ ആവശ്യപ്പെടുകയായിരുന്നു. ഗവർണറുടെ നിർദ്ദേശ പ്രകാരം രാജ്ഭവനിലെത്തിയ മനോജ് എബ്രഹാമിനോട് പഴയ സുരക്ഷാ ഉദ്യോഗസ്ഥരെ തന്നെ നിലനിർത്താൻ അർലേക്കർ ആവശ്യപ്പെടുകയായിരുന്നു. ഗവർണറുടെ ആവശ്യം എഡിജിപി അപ്പോള്‍ത്തന്നെ അംഗീകരിക്കുകയായിരുന്നു.