കൊച്ചി: ഓണ്‍ലൈന്‍ മാര്‍ക്കറ്റിങ്ങിന്റെ മറവില്‍ 1157 കോടിയുടെ തട്ടിപ്പ് നടത്തിയ ഹൈറിച്ച്‌ ഉടമകളുടെ 260 കോടിയുടെ സ്വത്തുക്കള്‍ ഇ.ഡി. മരവിപ്പിച്ചു. നേതൃനിരയിലുണ്ടായിരുന്നവരെയും കമ്ബനി പ്രമോട്ടേഴ്സിനേയും അന്വേഷണസംഘം കണ്ടെത്തി. ഇവർ ക്രിപ്റ്റോ കറന്‍സി ഇടപാടുകള്‍ നടത്തിയതായിക്കൂടെ ഇ ഡി കണ്ടെത്തി.
കേരളത്തിലും മഹാരാഷ്ട്രയിലും ഛത്തീസ്ഗഢിലുമായി 14 സ്ഥലങ്ങളില്‍ കേസുമായി ബന്ധപ്പെട്ട് കഴിഞ്ഞദിവസങ്ങളില്‍ റെയ്ഡ് നടത്തിയിരുന്നു. 1157 കോടി രൂപയോളം മള്‍ട്ടിലെവല്‍ മാര്‍ക്കറ്റിങ് അംഗത്വ ഫീസ് ഇനത്തില്‍ മാത്രം പ്രതികള്‍ തട്ടിയതായാണ് കണ്ടെത്തിയിരിക്കുന്നത്. പ്രമോട്ടര്‍മാരായ കെ.ഡി. പ്രതാപനും ഭാര്യ ശ്രീനയും ചേര്‍ന്ന് 250 കോടി ഇതില്‍നിന്ന് തന്നെ തട്ടിയെന്നാണ് ആരോപണം.
കേസിൽ ഇ ഡി നേരത്തെ തന്നെ 212 കോടി രൂപ മരവിപ്പിച്ചിരുന്നു.ഈ തുകയോടൊപ്പമാണ് 48 കോടി രൂപ കൂടി മരവിപ്പിച്ചത്.
32 കോടി കമ്ബനിയുടെ വിവിധ ബാങ്ക് അക്കൗണ്ടുകളിലും പ്രമോട്ടേഴ്സിന്റെയും കുടുംബാംഗങ്ങളുടെയും ബാങ്ക് അക്കൗണ്ടുകളിലും ഉണ്ടായിരുന്നതാണ്.ഇതും മരവിപ്പിച്ചതിലുള്‍പ്പെടുന്നു.
ഇതു കൂടാതെ തന്നെ 70 ലക്ഷം രൂപയുടെ കറന്‍സികളും സ്വര്‍ണാഭരണങ്ങളും നാല് കാറുകളും പിടിച്ചെടുത്തിട്ടുണ്ട്.