ചാണ്ടി ഉമ്മന്റെ ആരോപണങ്ങള്ക്ക് മറുപടി പറയേണ്ടത് നേതൃത്വമാണ്
ചാണ്ടി ഉമ്മന് സഹോദരതുല്യൻ
പാലക്കാട് ഉപതിരഞ്ഞെടുപ്പുമായി ബന്ധപ്പെട്ട് എല്ലാവർക്കും ചുമതലകള് നല്കിയപ്പോള് തനിക്ക് ചുമതലകള് നല്കിയില്ലെന്ന കോണ്ഗ്രസ് നേതാവ് ചാണ്ടി ഉമ്മന് എം.എല്.എയുടെ ആരോപണം ഉന്നയിച്ചിരുന്നു. പാലക്കാട് എം.എല്.എ രാഹുല് മാങ്കൂട്ടത്തില് ആരോപണത്തിന് മറുപടി നൽകിയിരിക്കുകയാണ്. ചാണ്ടി ഉമ്മന് അതൃപ്തി അറിയിച്ചത് പാര്ട്ടി നേതൃത്വത്തെയാണ് അതില് അഭിപ്രായം പറയേണ്ടത് നേതൃത്വത്തില് ഉള്ളവരാണെന്നും താനല്ലെന്നും രാഹുല് പറഞ്ഞു.
തനിക്ക് ചാണ്ടി ഉമ്മന് സഹോദരതുല്യനാണെന്നും പാലക്കാട് ഉപതിരഞ്ഞെടുപ്പില് അദ്ദേഹത്തിന്റെ സാന്നിധ്യം തന്റെ വിജയത്തില് വലിയ പങ്കുവഹിച്ചിട്ടുണ്ടെന്നും രാഹുല് മാങ്കൂട്ടത്തില് പറഞ്ഞു. നേതൃത്വത്തോട് അഭിപ്രായം പറയാനുള്ള സ്വാതന്ത്ര്യം എല്ലാ പാര്ട്ടി പ്രവര്ത്തകനുമുണ്ട്. പാലക്കാട് എനിക്ക് ലഭിച്ച 18840 വോട്ടിന്റെ ഭൂരിപക്ഷത്തില് ചാണ്ടി ഉമ്മന്റെ സംഭാവനയും ഉണ്ട്. പ്രചാരണത്തിന്റെ ആദ്യ ദിവസങ്ങളില്തന്നെ അദ്ദേഹം പാലക്കാട് ഉണ്ടായിരുന്നു, ഭവന സന്ദര്ശനത്തിന് കൂടെവന്നിരുന്നു. പാലക്കാട് നടന്ന കണ്വെന്ഷനിലും ചാണ്ടി ഉമ്മന് പങ്കെടുത്തിരുന്നു. പാലക്കാട് ഉപതിരഞ്ഞെടുപ്പ് സമയത്ത് ചാണ്ടി ഉമ്മന് പാലക്കാട് വന്നിരുന്നു. അദ്ദേഹത്തിന്റെ സാന്നിധ്യം പാര്ട്ടിയുടെ വിജയത്തിന് ഗുണപരമായ സ്വാധീനം ചെലുത്തുകയും ചെയ്തിരുന്നു. മഹാരാഷ്ട്രയിലും മറ്റും മലയാളി സമാജങ്ങളുമായി ചേര്ന്നുള്ള പ്രവര്ത്തനങ്ങളിലും പങ്കെടുത്തുവെന്നും രാഹുല് വ്യക്തമാക്കി. വയനാട്ടിലും ചേലക്കരയിലും നടന്ന പ്രചാരണ പരിപാടികളില് അദ്ദേഹം സജീവമായിരുന്നു. തിരഞ്ഞെടുപ്പ് നടക്കുന്ന മറ്റിടങ്ങളിലേക്കും പോകേണ്ടിവന്നതുകൊണ്ടാണ് അദ്ദേഹത്തിന് മുഴുവന് സമയവും പാലക്കാട് ഉണ്ടാകാന് കഴിയാതിരുന്നത്.